L’onn 2021 è l’onn da giubileum. Avant 50 onns han las dunnas en Svizra obtegnì il dretg da votar e d’eleger. L’egualitad tranter las dunnas ed ils umens n’è però anc adina betg cuntanschida. Las decisiuns politicas vegnan numnadamain prendidas per la gronda part dad umens. En tut ils gremis politics, en il quals vegnan prendidas decisiuns impurtantas, èn las dunnas anc adina ina minoritad. Er l’egualitad tranter dunnas ed umens sin il nivel social ed economic n’è anc betg realisada. Las datas davart la carriera professiunala, il salari, las rentas da vegliadetgna, la povradad, la cumpatibilitad, la lavur da tgira e la violenza èn cleras.

Quai sto sa midar! En collavuraziun cun ils Servetschs dal parlament envidan las organisaziuns svizras da dunnas alliance F –la Lia da las societads svizras da dunnas, la Cumissiun federala per dumondas da las dunnas CFDD, las Dunnas protestantas en Svizra DPS, l’Uniun da las puras svizras UPS, la Societad d’utilitad publica da las dunnas svizras e l’Uniun svizra da las dunnas catolicas SKF – ils 29 ed ils 30 d’october 2021 la Sessiun da las dunnas en la Chasa federala.

246 dunnas da tut las regiuns linguisticas da la Svizra discutan en la sala dal Cussegl naziunal davart las mesiras necessarias per concretisar l’egualitad tranter las dunnas ed ils umens. Lur propostas vegnan alura transmessas a las commembras ed als commembers da l’Assamblea federala. Questa Sessiun da las dunnas en la Chasa federala è la segunda suenter quella da l’onn 1991.

Charas Grischunas, nus quintain natiralmain cun Vossa preschientscha a la Sessiun da las dunnas 2021! Infurmaziun pli detagliadas davart quest eveniment e co che Vus pudais As annunziar, chattais Vus sin nossas paginas d’internet en franzos ed en tudestg.